1

An tann-di : lang a fanm sé on balyé lari.

On tipawòl konsa bon ba nonm osi.

Pou onlo adan nou, pawòl ka dégrenné

Dépi lèstonmak bat, bouch pa néta frenné.

Kouté kijan on nonm touvé mwayen savé

Lèstonmak a fanm a-y té on pannyé pèsé :

An gran mitan lannuit, misyé an kabann a-y

Ka lévé madanm a-y. Ka i té bizwen ba-y?

"Doudou, doudou, gadé sa ka rivé mwen la

An sòti ponn on zé! Penga répété sa!"

Monkonpè ka montré-y on zé i té kaché

Dépi lavèy oswè, avan i té kouché.

"Kwa-Jézikwa-Mari, janmé Bondyé

Ou pé kwè-mwen monchè, pa menm ba on zòyé,

An pé ké janmé di an ni on nonm-pondèz :

Pawòl-lasa té ké on jan èskandalèz!"

Landèmen bonmaten madanm ay fè mawché

I jwenn on zanmi-makòkòt, a pa té on péché

Mé sa té two fò ba-y, i té bizwen palé

Pawòl si bout a lang pa ka rivé valé :

-Kouté, machè kouté, mé penga répété

Sa an kalé di-w la, sé pawòl vérité

Mé kwa si bouch davwa a pa nenpòt kozé :

Yèswa mari an mwen ponn on sakré bèl zé!"

Konmè-la limenm a-y, on manni onlo moun ni,

Pwonmèt, janmé Bondyé, palé-la té fini.

Mé rivé i rivé koté on vwazin a-y

Zòt pa bizwen mandé, lavwa té ja ka bay.

Onsèl zé-la? Awa! Pa té tini asé :

Mari a konmè-la té ponn omwen twa zé!

É adan on batzyé, lajouné pa té bout

Si do a monkonpè, toutmoun té mè anrout.

Adan tout péyi-la yo té ka rakonté

Pou zé misyé té ponn, yo pa té pé konté!

Madanm-lasa pa té konnèt, on tipawòl kout :

"Bwè tout é manjé tout, mé pa janmé di tout!"

Mé i fin pa konpwann, lè nonm-la lagé-y, blip :

"Gadé pawòl an kyè pa janmé pouri trip!"